Warao tamatika ekida ebe. kokotuca jojabi kawaja eku Warao ekida. Warao kokotuka kuai: Ka idamotuma, ka nobo kuai ja. A wai, ka nobo a wai, awajabara ka nobo a wai (Aulara, Aurana, Aurala, Aorana). Tai kuai arotu. Araisa a warotu. Warao manamo janoko arao. Araisa a wai Etoare ( Etuare, Itoare). Tai Kuai warao. Tamatika warao ekida. Ama seke a warotu jakotai araisa kuare naoae. Kuare naoae, Karajo, oko tamatika isanamataya... ¿Sína oko minaja? Osiku oko minaja, Kuamara oko minaja, teko oko minaja, ojidu oko minaja. Kuai ojidu ekida. Najoroya aru. Akuaru ekida. Tiaja ama seke ka nobo nabakakore, tai a warotu nabakakore domu yajake. Domu jakotai a wai keri. Domu keri, keri irridaja. Tai nabakakore, ama seke tai dibunae: ma warotu, domu jatakí, ka najoro ajuaru ekidabitu... Jatabu isanae, jatanae: abajotanae. A jatabu naruae daukaba eku. Atae daisa isanae, jatae: wabae diana. Tai a jarak najoroae. Jisabae aru isiko. Najoroae, tai awarao dibía: Ahá, warotu, diana ine naría. Diana ma janoko ata. Naruae diana. Ama a warotu dibía: karajo, ma jatabu yakeraja dijanae. Domu a kuba yakeraja. Ama naruae, naruae... Najobuae, miae diana. Mikore jobaji eku jatabu naruae: ekida diana...Duhu monuka arokoatawitu ha. Tai ama seke iwaya diana isakitane. Isakitane obonokore diana jatabu jojabi eku yaruae. Yaruae, tamasabamo ejobonae diana. Jojabi tamate ejobonae. Joaika naruae, yaronae. Takore a rakoi ja, a rakoi tijidamo ja. Tijidamo Ka Natu ama seke tai isía dibunae. Dakoi, ma jatabu dijanae: joaika nakae. Ama tiakure ukuboto nonau...Ine joaika narukitane obonoya. Tane dibunae. A raki kanamunae, ukoboto nonae, nonae...Tamate, jobaji saba abanae: Mate tejoto, mate kabukida. Atae nonae, yiwaranae. Abanae: kaika diana. Autu tuaranoko, autu tuaranoko tane nonae.....Tai nanakayakore, wabojitakore tatuka tuarakitane. Tiaja ama abanae. Ama seke dibunae dina, jokoane jokowitu: Dakoi, ine naría ma jatabu isakitane, joaika nakaja kotai. Ama seke naoae tamate. Nanakanae diana. Taisi Kuare: tatukamo, tatukamo tuaraya.....Diana jobaji naoae. Jobaji oanae warao isaka kate ekida tamatika. Mikore ....Osiru erabitu, eraja miae.....Ama kuamara erawitu..Ibure erawitu...Oh erawitu. Tataka ubae. Kuamara Kubae, najoroae. Eraja wajabuae. Osibu Kubae. Diana atae naruae kuai. Naruae, tata nabakanae. Diana ama seke dibuane: karajo, tamatika sanamataya: najoro ekida. Oko tamatika aruwitu oko najoroya. Aru namaya kotai, jota aru. Tai kuare najoro era ine miae. Tata ama narukí... Tiakore ama seke waraotuma nabakakore ebika ebanae: Najoroae... Ahá, Ay warotu dibunae Iji ma omi yakaramataya...Iji jomakaba najoroya...¿Kasabamo iji miae? Ine miae joaika.....Tata kokotuka oko narute...Tamaja jobaji oko iabate. Oko joaika narute...Tamaja ka jobaji ojo iabate. Tane diana dibunae. A warotu kanamunae, dubujida tane. Aru werea a najoro tane. Isiko a ma ske joaika nanakanae diana. Joaika nanakakore autu jojisi asida nakakitane: Kuaba jakotai tai jojisi ekía ejobone obonokore diana nakasinae. Tai seke, ama seke era joaika nakae. Takore asibía a warao jakotai mate nanakanaja. Nobo naoaes Arona, tai jobaji awajabara a mitu kotai kuai bajinae. Ama tai araisa, a warotu Itoare tai seke a wai, tai ka Nobo, tai seke tamaja jobaji arai nakae, oko tamatika jakitane. Kuai bajinae asibía awarao. Tai bajía kotai obonobuae: Ine najoro eraja miae, takore mateyakore narunoko, jojisi asida nakae. ¿Sína a obonona? Kuabu a obonona. Ama seke kuabu a obonona. Ama seke kuabu jakotai ayamo kujuruae ejobakitane. Atae joisi yakera nakakitane nakasinaja kotai. Takore tai ayana kuarika nakasinae. Tai kaubu arai a kua sabasabamo kujuruya kaika. Ejobonaka-ta tane ayana kuabu a jotokobo bajinae. A jotokobo bajinaja kotai tai diana jokoyakore jokonakura tane. Tai bojinae......Ama kuai obonobuae Jebu namoninae. Jebu namoninae so: Ine so jate, dibunae. Araisa dibunae: Ine dokoi jate. Ine jebuida araisa dibía, jebuida ine jate boroboro. Ine namonía kotai, ma matoromo tiarone saba ine jebu jate. Jebu namoninae. Dokoi namoninae. So namoninae.....Ebe dokoi ekida, jebu sanuka arakate ekida. Takore tai ka Nobowitu jebuwitu namoninae. Ama mí: oko jebu ja. So ja, diaraja Oko wabaya. ¿Sína a obonona? kuabu asida kuare, joisi asida nakae kuare. Kokotuka wabakitane ekida: are jakuna. Takore ama kuai bajinae kotai jebu namoninae, so namoninae.....Ama oko wabaya so asía....Obo aisía oko wabaya. Ka saba oriasiae oko omi asibía. Arai isía jebu ja, jebu erwitu. Tai ka nobo jebu namoninae. Ka saba oriasiae oko omi asibía. Tamatika a kua diana. Tai kokotuka.
Relator: José Pinto. Jatabuidanoko. Febrero de 1966. Grabación, transcripción y traducción: Antonio E. Vaquero Rojo.
No hay comentarios:
Publicar un comentario